Theatre Bandhuon (aur Bandiniyon) ko namaskar...!!

Report Part 1 ki dil-dehla dene waali safalta ke baad A-Grade events ka B-grade lekha-jokha lekar ek baar phir aapke saamne haazir hain – Fizool Lakhnavi. Jaisa ki naam se zaahir hai, hum koi bhi kaam fizool mein nahin karte (waise uss hisaab se naam ‘na-Fizool’ hona chahiye tha, par wo-h ‘na-maakool’ se kaafi milta julta hai isliye shayad Abba-huzoor ne nahin rakha!)
Anyways, jaisa ki ab tak andaza lag gaya hoga, (Andaza bole toh idea, varna sun ke toh lagta hai Anda kha ke hone waali koi beemari hai – Anda-za!), aaj ki humaari reporting thodi chaaloo kism ki rahegi kyunki pehli waali reporting thodi Engineering Lecture ki tarah ho gayi thi. Aap logon ne phir bhi usse pasand kiya, yeh aapki na-samajhi hai ya badappan, keh nahin sakta. Shayad badappan hi hoga…(waise bhi, Veerappan toh ab mar chukka hai..!)
Haan, toh Part-2 ki shuruaat kee jaaye wahin se jahaan se part-1 ka ant hua tha…! ‘Khamosh…Adaalat’ ke baad baari thi ek aise naatak ki jisne iss Fizool Lakhnavi ke dilo-dimaag ko apni giraft mein le liya tha aaj se koi 3 saal pahle. ‘Sir…Sir…Sarla’ wo-h pehla play tha jise dekhne ke baad mujhe laga tha ki abhi duniya main maine kuchh dekha hi nahin…! (Uske baad kitni baar aisa laga hai, yeh nahin bataaounga…!) Aur jab Sumit Saxena, 3rd Mining, ne aaj se kareeb 2 saal pahle mujhse kaha ki wo-h yeh naatak banana chahta hai toh mujhe laga wo-h IT ke bhookhe bhediyon ke saamne ek naazuk memne ko daalne ki baat kar raha hai…!
Aur 6 March ko iss memne ka show dekhne main bhi wahin pahuncha, fark sirf itna tha ki yeh naatak memne ki khaal mein ‘Tiger Memon’ nikla…yani ki bahut hi khatarnaak. Pahle din ki safal shuruaat ke baad poori Abhivyakti team ka enthu kaafi high tha aur yeh maana ja raha tha ki kam se kam aaj, Janta ki koi fight nahin hogi kyunki jo log ‘Adaalat’ dekhne aaye they, wo-h aaj shaam bhi aayenge hi! Aaj shaam ke liye Venue-Gopal bhi change they…kyunki director ki vision ke hisaab se, yeh waala play G-11 mein zyada achha lagta. Iss natak ke sets bhi shaandaar lage aur G-11 mein itna bhaari set-design kabhi nahin laga hai, itihaas ‘saakshi’ hai. (Aur Mallika Sherawat…hee hee hee…!!) Par dopahar hote-hote Director saahab ki shakal dekh kar aisa lagta tha jaise poora set unhone apne kandhe par hi uthaya ho…Baaki do kalakar, Mridula aur Nishant thode cool nazar aate they. (Shayad abhi-abhi 7-Up maar ke aaye they!)
Jaisa ki har roz hota hai, 6 march ko bhi shaam huyi aur jaisa ki har baar hota hai, IT ki janta 545 pm se pahle g11 ki taraf nikali bhi nahin. Par 6 bajate-bajate g11 kareeb 80 percent bhar gaya aur impatience ki ek lahar si daudne lagi, ki bhaai, naatak shuru karo. Par backstage jaakar dekha toh Sumit saxena abhi make-up hi lagwa rahe they. Tab kya tha, samay bitaane ke liye, karna hai kuchh kaam…humaare jaise ‘Fizool’ ke logon ko 2-4 BeFizool ki baatein karne ke liye on-stage bula liya gaya. Humne shuru kiya, ‘Mujhe yeh insti chhode huye 2 saal ho gaye…’ lekin tabhi andar se aawaaz aayi, ‘Abe kameene, har 6 mahine mein toh chala aata hai mooh uthaaye yahaan, ab kisse ullu bana raha hai 2 saal ki baat se. (Par Amit Jee ne K3G mein humein ek bahut achhi cheez sikhaayi hai, ‘Keh diya…toh bas keh diya…haayein..!’) Toh hum bhi date rahe aur jaise hi humaare Sir (Nishant), Sarla (Mridula) aur Phanidhar (Sumit) taiyyar huye, humne apni kursi grahan kee.
Naatak ke shuru mein bhari-bhari kavitaaon ke hone se janta kuchh der tak toh sann rahi par jahaan Sir aur Phanidhar ke beech aaropon-pratyaropon ka silsila shuru hua, janta ko bhi maze aane lage. Sarla ki entry ke baad toh play (as per majority of public opinion) “Ek Film ki tarah chala!” Aur iska kaafi sara shrey jaata hai Sumit Saxena ke direction aur John Abhishek (2nd Year ka ek aur honhaar beerbaan) ke sangeet ko. Act 1 ke khatam hote-hote janta ke parkhachhey ud rahe they aur sirf 5 minute ka break (which was needed for the costume change by Sarla) bhi bhaari lagne laga. Act 2 mein wo-h saari gutthiyaan sulajhti hain, jinhein teeno actors ne Act 1 mein badi khoobsurati se uljhaya tha…! Sumit Saxena ko sabse zyada taaliyaan mili (kyunki shayad unke pyaar mein haarte huye kirdaar ke phat padne se janta identify kar paayi..!?) Sarla ke role mein Mridula ne wo-h kar dikhaya jo main nahin jaanta kinhi Shandon mein bayaan kiya ja sakta hai ya nahin. Nishant Tripathi, ne Sir ke role ke saath bharpoor justice kiya, aur much-deserved taareefein bhi jhola-bhar batori. Sumit Saxena as a director jitne creative dikhe, as an actor utne hi energetic aur intelligent bhi nazar aaye.
Naatak khatm hote hote aise bahut saare pal ikathhey ho gaye jab janta ko apne aansoo rokne pade…aur Makrand Deshpande likhit play ki ending ko halka sa twist dekar Sumit jee ne ispar apni pataaka-chhaap bhi laga dee. As expected, ek baar phir Standing ovation se G11 ka Centre of gravity thoda dagmaga gaya…! Par wo-h kahte hain na – ‘Hungama hai kyun barpaa, thodi si toh change huyi hai…!’ Naatak ke baad Sumit, Sushant, Pulkit, aur Vipul Naagar Bhaiyya (Abhinay-Jyoti ke sanchaalak, jinhone dono plays mein dher saara creative and otherwise input diya.) ne stage par aakar 2-shabd ke naam par kai saare shabd kahe. And after such a successful show, janta ne sab kuchh suna…aur apun ek baat bole toh beedu, sunna-ichh maangta hai…!
Aur iss tarah se 2-din ka samaaroh aap sab ki duaaon aur sponsorship ke chalte, superhit ho gaya. Aur jaisa ki aksar hota hai, ‘Yaadein dil ke raste jaati hain, aur aankhon ke raste baahar aati hain.’, program khatam hote hi ek chhota sa, very personal-sa, rone-dhone ka kaaryakram hua. Kuchh naadan log toh apne kapade bhi le aaye hostel se ki yahin dhulwa lete hain, Dhobi ke paise bachenge. Par unhein kya pata, ‘Zindagi shaam ke baad dheere hi chala karti hai, Namak ke paani mein bas aankh dhula karti hai…’ Well, kaafi senti ho gaya, aur Fizool Lakhnavi zyada senti maarne ke mood mein nahin hai, wo-h bhi group par. Jisko chahiye ho, personal email maar dewe, hum Sentiyaap-Chalisa bana ke bhej denge.
Aur agar aapko lagta hai ki katha yahin samaapt hoti hai toh aisa nahin hai…2-3 din ke andar Part 3 bhi chep daalenge….aur usmein hongi kuchh insider reports, kucch bitter reviews, aur haan kuchh aur masaaledaar khabarein bhi jo abhi tak kahin nahin chhhapi…! (Iss poore para ko zara phir se padhiye, uss tone mein jiss tone mein yeh log TV Skyshop pe body building ka saaman bechte hain)
Abhi ke liye itna hi, aur hopefully, Yahoo waale itni lambi mail lene se mana nahin karenge…!
Aur Ani-1 ke trend ko jaari rakhte huye….Harr Harrr Mahadev….!!
- Fizool ka Signature.

Part 3 coming soon....

If you too were a part of the IT theatre and still wanna be...
The ITBHU Theatre Yahoo Group